• مساواة الرجل بالمرأة أصبحت ضرورة حتمية !

من واقع الحياة أصبحت مساواة الرجل بالمرأة مطلب حتمي وإكتشفت ان الفتاة العربية واخده حقها تالت ومتلت.
يعني مثلاً:-
1- البنت والدها ملزم إنه يجهزها ولو الولد قال لأبوه انا عاوز اتجوز هيقله منين يافالح جوز نفسك
2- البنت هي اللي بتختار الشخص اللي هترتبط بيه وياسلام لو حلوه شوية وكل يوم يجيلها 3 او 4 عرسان وتقول ( لأ ده قصير – ده شكله مش حلو – ده تخين شوية ده شعرة مش عاجبني )
في الاخر تختار علي مزاجها
3- لما تتخطب خطيبها ملزم في فترة الخطوبة يجيبلها هداية ولو مجبش مره تبقي وقعه اهله منيله بنيله لكن هي مش ملزمه تجيب وأصلا هو مش مستني منها حاجه غير شكراً!!
4- الشاب بيدخل الجامعه ابوه يقله انت طلعت بطاقه يعني بقيت راجل روح اصرف علي نفسك ,, لكن البنت تفضل تاخد من أبوها لغاية لما يديها لواحد يصرف عليها بردو!
5- البنت لو أبوها زعل منها مش هيقلها مش عاوز اشوف خلقتك في البيت اطلعي بره , لكن الولد ابوه بيطلعه بره البيت ويخليه يبات جنب عم عبده البواب
6- الميراث مثلاً : هنفترض اتنين متزوجين والزوج ورث 1000 جنيه والست 500 جنيه هي تاخد ال 500 جنيه وتحطهم في البنك وزوجها ميقدرش يقلها متجيبي 10 جنيه وغير كده جوزها بياخد الضعف وبتشاركه في ميراثه يبقي مين اللي أخد أكتر؟!
7- حوالي 50% من ستات مصر بيضربوا الرجاله ودي دراسة أعدها الدكتور السيد عوض أستاذ علم الاجتماع في كلية الآداب جامعة قنا!
8- البنات دلوقتي بقوا أكتر من الشباب يعني لو عملوا انقلاب هيبهدلونا !!
9- ليه الولد هو اللي لازم يعاكس البنت ويمشي وراها ,, يعني مشفناش مره واحده بتعاكس شاب ( ياقمر – ياعسل – ياواد ياطويل انت – يخرب بيت شعرك – عنوانك ايه ) !!
10- حتي في الجامعة البنت لو اتأخرت عن المحاضرة هتعيط شوية للدكتور وهيدخلها لكن لو ولد هيقله خليك بره واقف في الشمس زي الكلب
11- الراجل هو اللي لازم يشتغل ولو مشتغلش تبقي مصيبه مع ان كل وظيفتها في البيت تطبخ وتقول لإبنها هتسكت والا انادي علي العو ( تقصد جوزها )
12- في المواصلات ليه الولد اللي لازم يقوم لو في بنت واقفه في الأوتوبيس علشان تقعد مكانه مع ان صحتها كويسه وتقدر تقف 100 يوم بدون مشاكل
13- البنات كل همها وتفكيرها في المستقبل ان تلاقي حد يصرف عليها غير أبوها ولو اتطلقت منه هترجع لأبوها وهيصرف عليها
14- الرسول صلي الله عليه وسلم وصي علي النساء وموصاش علي الرجاله
15- الواحده لو ليها معاش من والدها عمره ما بيتقطع عنها خااااااالص لكن الولد بعد سن ال 21 هيشحت والحكومه مش هتعبره
16- الواحد لو زوجته اتعاكست في الشارع هيتخانق وممكن يتعور علشانها لكن لو واحده بصت لزوجها هتنبسط ( جوزي حلو والستات معجبه بيه )!!
17- البنت مش بتدخل الجيش ولو الحرب قامت بردو مش هتدخل الجيش
18- الشاب بعد التخرج بيفكر في مليون حاجه ( هدخل الجيش والا لأ – طيب هخطب مين – ومين هترضي بظروفي – طيب ولو خطبت هجيب منين – طيب بعد الخطوبة هأجر شقه منين – والعفش والشبكة والمهر -و – و – و – و) طبعا إحتمال كبير يروح مستشفي الأمراض العصبية!
19- الست لو بقت حامل جوزها هيفضل يخدمها لمدة 9 شهور ولو هتخلف كل سنتين يبقي الراجل هيفضل يشتغل بره البيت وجوه البيت طول حياته!! وكل يوم عند دكتور أمراض النساء
20- بعد الموضوع ده انا تعقدت !!

أطالب بالنيابة عن رجال مصر بأن نتساوي مع المرأة

_______________________________
تدوينات ذات علاقة بالموضوع

• قيدوا حرية المرأة , فالمرأة فتنة كبيرة !
• النساء يبكين بمعدل يزيد عشرة أضعاف عن معدل بكاء الرجال!!
• المرأة هي الحب والوفاء والصمت والجمال والحياة والأخلاق!
• من أقول أنيس منصور الطريفة عن المرأة والحياة!